| dc.description.abstract | I samband med ombyggjing av Hovin skule, og utviding av uteareal, vart det gjennomført ei utgraving av KHM i perioden 17.10. – 06.11.2007. Området var utgravd ved maskinell flateavdekking, og arealet som vart avdekt var 2.268,1 m2. Det vart funne 58 sikre kokegroper, 6 usikre kokegroper, 3 fotgrøfter, 3 graver, dyrkingslag og ardspor. Utgravinga viste at området har vore i bruk over lang tid. Gravene er blant dei yngste strukturane på feltet, og dyrkingsspora er eldst. Kokegropene ligg hovudsakleg i eldre dyrkingslag under dagens åker, men det låg også kokegroper i undergrunnen. Gropene var runde eller ovale i formen, og dei låg på rekkjer på ei flate før terrenget skrådde bratt mot aust. Fire av kokegropene datert til romertid, ei til folkevandringstid, ei til merovingertid og ei til vikingtid. Fotgrøftene som markerte dei utpløygde gravhaugane låg i sør på feltet, diameteren varierte frå 7 til 13 meter. Det blei i tillegg funne tre mogelege graver i fotgrøftene. To var branngraver, medan den tredje var ei skjelletgrav med funn av pilspiss frå vikingtid. Det at vi har tre fotgrøfter saman, og at det fortsatt eksisterar ein gravhaug rett ved, tyder på at det før har ligge eit gravfelt på staden. Dateringane frå fotgrøftene og gravene er til merovingertid og vikingtid. Analyser av brente bein frå gravene kunne ikkje bestemmast nærmare, noko er truleg dyrebein. Dyrkingslaga er 50 cm tjukke enkelte stader, og ardspora i botn tyder på at området har vore kontinuerleg dyrka i fleire tusen år. Det eldste dyrkingslaget er datert til mellom-neolittisk tid. Dette er ei av dei eldste dateringane som er gjort på slike dyrkingslag i austlandsområdet. Det blei også funne korn av bygg som indikerar at dette har blitt dyrka på staden.
Prosjektleder: Margrete Figenschou Simonsen. | en_US |