Diagnostisk undervisning i matematikk : innhaldsanalyse av læreverk i matematikk frå L97 og LK06

Abstract

Litteraturstudien viser at undervisning basert på kognitive konfliktar i matematikk gjev auka langtidslæring, sett i forhold til ”tradisjonell” undervisning. Denne undervisningsmetoden har som siktemål å kartleggje delvise utvikla omgrep og misoppfatningar, og ved hjelp av å skape kognitive konfliktar er metoden med på å sikre solide omgrep i matematikkinnlæringa. Denne metoden å undervise på har blitt kalla diagnostisk undervisning.

Litteraturstudien viser også at det er vanskeleg å unngå at misoppfatningar i matematikken oppstår. Litteraturen viser også at kateterundervisning og gruppearbeid er den mest vanlege undervisningsforma i skulen. Det er læreboka som dominerer som læremiddel under desse seansane. Det blir nytta mykje tid til at elevane arbeider med oppgåver og at læraren går rundt og hjelp elevane. Læreboka dominerer også i desse situasjonane. Konklusjonen er ganske klar: Læremidla sin plass og funksjon viser at læreboka har ein dominerande posisjon i norsk skule.

Problemstillinga for denne studien er todelt: Korleis blir oppgåver om vinklar framstilt i lærebøker for 6. klasse med utgangspunkt i diagnostisk undervisning? Kva seier lærarrettleiingane knytt til L97 og LK06 med utgangspunkt i diagnostisk undervisning? Hovudsiktemålet var å finne ut om læreverka har fokus på diagnostisk undervisning, og om eg fann igjen oppgåver som baserer seg på metoden.

Teorigrunnlaget har fleire greiner. Frå konstruktivistiske læringsteoriar som fundament, til meir konkrete teoriar som skildringar av læreplanane og diagnostisk undervisning som undervisningsmetode. Teorigrunnlaget blir så utvida til geometri, omgrepsdanning i geometri, vinkelomgrepet og diagnostiske oppgåver kring vinkelomgrepet.

Studien er ein kvalitativ innhaldsanalyse av lærarrettleiingar og grunnbøker til ti læreverk for 6.klasse i matematikk, seks knytt til L97, og fire knytt til LK06. For å gjennomføre analysen vart det nytta kriterium basert på litteraturstudien som reiskap for å kategorisere ulike funn i analyseprosessen og som reiskap for drøftinga av datamaterialet.

Denne studien viser at det er fleire av læreverka som inneheld oppgåver med diagnostisk preg, utan at dette blir nærare omtalt i lærarrettleiingane. Nokre av læreverka har fokus på misoppfatningar, og kjem med eksempel på typiske misoppfatningar kring vinkelomgrepet, utan å ha generell fokus på diagnostisk undervisning.

Det er to læreverk som har eit klart fokus på diagnostisk undervisning. Det kjem fyrst og fremst fram i lærarrettleiingane gjennom tydelege definisjonar på kva diagnostisk undervisning er, og korleis ein kan jobbe med å sikre solide omgrep i matematikken. Også i desse grunnbøkene er det oppgåver som er forma med tanke på at misoppfatningar skal kome til syne.