Meld. St. 18 Læring og felleskap, strategi 1: Fange opp - følgje opp - Rettleia lesing ein mogeleg suksessfaktor? : Ei intervjuundersøking av fire lærarar sine erfaringar med undervisningsmetoden rettleia lesing.

Abstract

Samandrag Tittel Meld. St.18 Læring og fellesskap, strategi 1: Fange opp - følgje opp - Rettleia lesing ein mogeleg suksessfaktor?

Bakgrunn og føremål Tema for masteroppgåva tek utgangspunkt i stadig sterkare sentrale styringar om tidleg innsats og tilrettelegging av gode læringsmiljø i skulen for alle innanfor fellesskapet. Melding til Stortinget 18 sin strategi 1: Fange opp ¬- følgje opp seier: ”Barnehagen og skolen skal bli bedre til å fange opp og følge opp dem som trenger hjelp og støtte. Gode læringsmiljøer skal stimulere elevenes motivasjon og arbeidsinnsats. Tilpasset opplæring og tidlig innsats skal sikre størst mulig læringsutbytte” (2010 - 2011, s. 11). Oppgåva avgrensa seg til å omhandle elevar som treng hjelp og støtte i leseopplæringa. Formålet med oppgåva er å synleggjere undervisningsmetoden rettleia lesing og undersøkje om bruk av denne metoden i byrjaropplæringa kan vere ein mogeleg suksessfaktor i forhold til Melding til Stortinget 18 sin strategi 1: Fange opp - følgje opp.

Problemstilling Kan rettleia lesing som metode vere ein mogeleg strategi for å fange opp – følgje opp elevar med behov for særskilt hjelp og støtte i leseopplæringa?

Metode Eg ynskte å få fram lærarar sine erfaringar og opplevingar ved bruk av undervisingsmetoden rettleia lesing, det er difor valt ei kvalitativ tilnærming med intervju som forskingsmetode i denne oppgåva. Fire lærarar er intervjua med utgangspunkt i ein semistrukturert intervjuguide. Utvalet er kriteriebasert og lærarane som er intervjua har forholdsvis 4, 5, 8 og 10 års erfaring med å jobbe med rettleia lesing som metode. Alle intervjua er tekne opp på diktafon, transkriberte, koda og analysert. Det er nytta ein hermenautisk metode som analytisk tilnærming. Datamaterialet er presentert i form av tema med direkte sitat frå informantane, som undervegs er drøfta opp mot teori.

Resultat Stortingsmelding 18 Læring i fellesskap legg vekt på å få det systemet vi har i dag til å fungere betre. Dette forskingsprosjektet syner at rettleia lesing ivaretek dei ulike dimensjonane i leseutviklinga og byggjer på grunnleggjande teori knytt til barn si leseutvikling. Ved bruk av rettleia lesing kan ein bruke den kunnskapen ein allereie har om grunnleggjande leseopplæring på ein systematisk måte. Funn viser at rettleia lesing organisert som ein del av ei heilskapleg leseopplæring, kan bidra til både å førebygge, fange opp og følgje opp elevar med behov for særskilt hjelp og støtte i leseopplæring på ein god måte innanfor fellesskapet. Samtidig kan metoden vere ein sentral faktor for den enkelte elev si oppleving av meistring og påverke til auka motivasjon. Forsking viser at dette igjen har positiv betyding for læringsmiljøet (Skaalvik og Skaalvik, 2011). Rettleia lesing kan bidra til tidleg innsats, tilpassa opplæring og tilrettelegging av eit godt læringsmiljø for alle innanfor fellesskapet.