Kva er eit godt kor? : Tankar og haldningar kring vurdering i internasjonale korkonkurransar

Abstract

”Kva er eit godt kor?” Tankar og haldningar kring vurdering i internasjonale korkonkurransar

Bodil Kvernenes Nørsett, mars 2003

Avhandlinga tek for seg tankar og haldningar kring vurdering og vurderingskriterier i 3 ulike internasjonale korkonkurransar i Europa. Eg har intervjua dommarar og observert Syng For Oss-konkurransen i Bergen, Llangollen International Eisteddfod i Wales, og Schubert Internationales Chorwettbewerb i Wien, alle i 2001.

Etter dei to fyrste konkurransane fann eg det fruktbart å ta inn det prosessuelle aspektet ved det å konkurrera, og den siste konkurransen inkluderer observasjon av mannskoret Guldbergs Akademiske Kor semesteret før dei deltek i konkurransen i Wien. Slik prøver eg å gje eit bilete av korleis ein korkonkurranse er ein prosess for dirigent og kormedlemer, meir enn berre vurderinga av eit augneblinksprodukt.

Det teoretiske grunnlaget mitt byggjer eg på seks tonesetjande musikalitets-forskarar på 1900-talet: Carl Seashore, James Mursell, John Blacking, Jon-Roar Bjørkvold, Peter Bastian og Christopher Small.

Under hovudfokuset på tankar og haldningar, går oppgåva nærare inn på kva vurderingskriterier juryane spesifikt vurderer etter, og eg analyserer og drøftar utsegn frå dommarane opp mot musikalitetsteoriar og heilskapstenkning. Vurderingskriteria i dei 3 ulike konkurransane vert diskutert og drøfta opp mot kvarandre. Eg stiller spørsmål om vurderingskriteria endrar seg med kulturell faktor, og om visuell vekting vert teken omsyn til i vurderinga. Subjektivitet og objektivitet i bedømminga er eit sentralt tema, og dommarane sitt eige syn på vurdering i korkonkurransar. Alt innfor ei ramme av spørsmålet om musikalsk kvalitet: Kva er eit eigentleg eit godt kor – kan det vera bra sjølv om det er surt?